كتبها محمد عاصى هنـــا
استنى بس كدة يا بتاع التحرير قبل ماتقتح قاموس الشتايم والتخوين وتسمعهولى لفظ لفظ
واستنى برده يا عاشق ميدان مصطفى محمود .. قبل ماتفتحلى دراعاتك وتقولى اخيرا عرفت الحقيقة وترحب بيا وسطكم
استنوا قبل اى حكم .. اقروا اسبابى .. لان اكيد مش زى مانتم فاهمين
انا اتخدعت في الثورة دى ... غسلولى دماغى ... فضلو قبل 25 يناير يحشوا دماغنا باحلام و مطالب وفهمونا اننا هننزل نضرب ويمكن نموت عشانها بس في الاخر هاتتحقق
وعرفوا يقنعونى باهميتها ووصلت لدرجة انى مستعد اعمل اى حاجة مقابل المطالب اللى بقت حلم شخصى
قالولنا ايه بقى يا سيدى ...خلونا نحلم بايه !!!!
اول هتاف كان "عيش ... حرية ... عدالة اجتماعية" ...
اقتنعت ان احنا فعلا نقدر نخرج من الكبت والقمع ... اننا نعرف يعنى ايه حرية فعلا .. اننا نسمع بعض ونحط كلامى على كلامك على كلامه عشان فكرة نخدم بيها مصر
وزاد اقتناعى ان مصر ممكن ترجع دولة عظمى كمان ... اقتصاديا واجتماعيا ... هنقدر نلغى الفقر ... هنقدر نلغى الجهل ونطلع جيل مش بس متعلم ويقدر يخدم مصر لأ كمان يخدم العالم كله ...
اقتنعت ان ممكن فعلا يبقى فيه عدالة ..... مفيش فجوات واسعة زى اللى موجودة دلوقت بين طبقة وتانية
اقتنعت فعلا ان هيبقى فيه عدل .... الكل واحد قدام القانون ... كل اللى بيغلط يتحاسب ... وخصوصا اللى بيقفوا قصاد نهضة مصر ويمنعوها من التقدم
بعدين قلت في نفسى .. طب ازاى هيبقى فيه عدل من غير ما نحاسب اللى موجودين وغلطوا دلوقت ... الى فضلوا عايشيين طول عمرهم بيرجعوا مصر لورا عشان مصالحهم الشخصية
اللى خلونى انزل انا وغيرى كتير نطلب بحاجات طبيعية ... حقوق مواطن ... محرومين منها من ساعة ماشوفنا الدنيا ... ويمكن نموت عشانها .وهى فى الاخر اصلا حقوق طبيعية لاى انسان !!!!!
الناس دى لازم تتحاكم ... الناس دى لازم تبقى اول خطوة واول مثال على مصر الجديدة العادلة .. مصر اللى مافيهاش حد اعلى من القانون .. مصر اللى انا اقتنعت اننا ممكن نحققها
و عشان ناكد على حلمنا ده والفكرة اللى اقتنعنا بيها .. لاقينا نفسنا بنقول .... يسقط يسقط حسنى مبارك ... الشعب يريد اسقاط النظام
دخلت معتقلات ... نمنا على الرصيف .... ناس فقدت عيونها ... ناس فقدت قدرتها على الحركة ... ناس فقدت حياتها ....بس فى الاخر الحلم اتحقق
وحصل اول اشارة لسقوط النظام بسقوط راسه .... او زى ما كنا فاكرين يعنى انها اول اشارة ... بدأنا بعدها نثبت اننا هنبنى مصر بادينا ..تنظيف الميدان والشوارع ... ودهن الارصفة ... حملات التنظيف في كل حته
وده تاكيدا على رغبتنا في بناء مصر جديدة فعلا مش مجرد روح انتقام من رموز قديمة....
يوم التنحى سألت نفسى هو فعلا كده خلاص النظام سقط ؟؟؟ .... هو فعلا كده عرفنا نخلص من الماضى ... وهو ده الوقت المناسب اننا نبص للمستقبل ونبدأ نبنى !!!
و جه الرد بسرعة فى بيان للمجلس العسكرى .... انه مع الثورة .. ومع شباب الثورة ... ووظيفته الاساسية في ادارة البلد هى التاكيد على المطالب بتاعتنا ....
كده خلاص بقى... نركز احنا في المستقبل .. والمجلس هيقوم بدورة في التخلص من الماضى
بس ثانية واحده كده ... ماهى كل حاجة حلوة اوى اهى ... ليه بتكره الثورة بقى !!!!
هقولك يا سيدى اصبر عليا بس ...قوم اعمل كوباية شاى وارجع كمل
الكلام اللى فوق ده كله لغاية يوم التنحى .. عدى بعد كده اكتر من اربع شهور لغاية يومنا الحالى ..
كنت فاكر ان هيبقى فيه فرق بين النظام القديم والجديد ...بس في الفترة دى الفرق مكانش بيدينى امل بالتغيير ... كان بيدينى يأس
كل يوم كنت باخد خبطة في دماغى من النظام الجديد "المجلس العسكرى" ..
خبطات تثبت اننا مش بنخلص من الماضى فعلا... ومش هانخلص ...خبطات رجعتنى من التفكير في المستقبل وخليتنى افكر فى اللى فات ..رجعتنى من حلم البناء وخلتنى ارجع تانى افكر في هدم الماضى
النظام القديم كان بيعامل اى مواطن ليه مطالب انه عميل مدسوس باجنده ..... النظام الجديد بيعامله على انه بلطجى !!!!
القديم بيطلع قرارات وقوانين مع نفسه من غير مايسمع حد ... والجديد بيسمع القوى السياسية في الحوارات الوطنية و سمع الشعب في الاستفتاء وبرده بيطلع القرار مع نفسه !!!!!
هى دي الديموقراطية اللى شاركت في الثورة عشانها !!!!!... هو ده معنى ان الشعب هو اللى بيحكم نفسه ..!!!!!
القديم كان بيتعامل مع المواطن على انه حيوان ملوش اي حقوق في الحياه .. والجديد بيتعامل معاه على انه عايز فلوس و بس ....فاكرنا عايزين من المحاكمات فلوسنا و بس
القديم ماكنش مخلينا نعرف فيه ايه بكرة ... والجديد بيديلنا بدل السيناريو عشرة ... بيديلنا حيرة ... زيادة على اننا مش عارفين برضه مش عرفين في ايه بكرة
طب مااستنى واشوف ... الموضوع مش هيحصل في يوم وليلة
بس فين الحرية ؟؟؟!!!
الحرية مش عايزة فترة عشان تتحقق ... مش لازم استنى سنتين عشان اشوف حرية
النظام القديم مكانش بيقبل النقد ..... الجديد مش بس مابيقبلش .. لا وكمان بيحاكم المدنيين محاكمات عسكرية
الجيش ضرب متظاهرين بياكدوا على مطالب الثورة في 9 مارس وكمان عذب ناس منهم ...بحجة انهم بلطجية ... عشان الناس تصقفلوا
مش مؤمن بحق الشباب بانهم يعتصموا عند كليتهم ..رفضا انهم يكملوا دراسة تحت ايد رمز من رموز النظام القديم
رافضين انهم في الوقت اللى البلد فيه بتنضف ...يسيبوا رمز مضلل من رموز النظام القديم عميد كليتهم و مسئول عن تخرج دفعة جديدة من الاعلاميين الاحرار او المفروض يعنى يبقوا احرار
و غير ان الشرطة عسكرية دخلت حرم الجامعة تفض الاعتصام ... اتفصل تسع طلاب منهم فصل نهائى ....غيرالاساتذة المتحولة للمجلس التاديبي بسبب انهم تعاطفوا معاهم
انا وغيرى اتهددنا بالتحويل لمجلس تاديبى .عشان مارسنا سياسة في الجامعة
فين تنضيف الجامعات من رؤسائها وعمدائها اللى تم تعينهم من امن الدولة .. مش ده برضه مطلب اساسى للثورة عايزة تمحى الماضى الفاسد من تاريخ مصر !!! مش ده مطلب للثورة اللى حلمت بيها واقنعت بمطالبها ونزلت انا وغيرى عشان نحققها !!!
ده حتى مش مؤمن بحق الشباب انهم يحلموا ... ويروحوا عند سفارة الكيان اياه ياكدوا لنفسهم ان حلمهم حيتحقق قريب .. او يأكدوا على الاقل انهم اقوياء ويقدروا ينفذوا كل اللي بيحلموا بيه ... يأكدوا لنفسم ان مصر ممكن ترجه دولة عظمى قويةوبتهمة انهم بلطجية ضرب عليهم نار و قنابل مسيلة ... لا واعتقالات كمان ..
حاولت ادور على الحلو في الموضوع ..قلت يمكن عشان الموضوع فيه خطا سياسى و مش وقته (افتراض طبعا).... وده حساب لأى حد بيخطأ خطأ سياسى .. وتنفيذا لمطلبنا في العدل والحكم بالقانون بس لو الخطا السياسى عقابه كده ...
فين عقاب اللى اجرموا سياسيا قبل كده في مصر ..
الجيش وقف قصاد شعبه حماية للسفارة الاسرائيلية ... ومعرفش يحمى كنيسة واتنين ...او يمكن مكانش عايز ومش هامه
قلت في البداية انى كنت فاكر المجلس العسكرى هو اللى هايهتم بالماضى ... وينضف كل بواقى النظام القديم
بس الاعلام لسه زى ماهو ... المحافظين والمجالس المحلية لسه زى ماهم ...
لا الاعلام بقى حر ... ولا رموز النظام القديم في المجالس المحلية اتغيروا !!!
و بعدين فين العدل ؟؟؟ ولاهو احنا برده محتاجين نستنى 5 سنين عشان نشوف عدل !!!!
فين المحاكمات الى هتثبت لنا ان احنا بدأنا عصر جديد في مصر مفهوش حد اعلى من القانون
فين تقديم مبارك للمحاكمة بتهمة الخيانة العظمى، بعد اعتراف المشير بإعطاء مبارك الأمر للقوات المسلحة بقتل المتظاهرين.
فين محاكمة العادلى و اعمدة الداخلية من اللواءات لغاية امناء الشرطة اللى اتسلت برصاصها وجربت اسلحتها واختبرت قدرتها على النشان على عيون المتظاهرين منهم اللى مات ومنهم اللى ربنا رحمه واتعمى بس
ياراجل ده انا كنت مستنى محاكمات كنت مستنى خطوة اولى في التحول لمصر العادلة ...بس الظاهر ان مش ده اللى بيحصل ..وبقى الى هامم في المحاكمات الفلوس و بس .. الفلوس اولا واخيرا !!!!!!
الظاهر ان مش دى الثورة اللى انا كنت عامل حسابى عليها ... والمجلس هنا بيعمل غير اللى طلبناه منه
بس الناس بتقولى المجلس هوا اللى حمى الثورة ... المجلس هو اللى بيحافظ عليها ..المجلس هو الخط الاحمر ... المجلس اكد كذا مره انه مع الثوار ومطالبهم وماينفعش نعترض عليه !!!!
طب اذا كان اللى بيعملو المجلس ده فعلا هو الثورة ... فانا بكره الثورة ... وبكره اللى خدعنى وخلانى اشارك فيها
بكره اللى نقلنا من سجون الامن المركزى ...للسجون العسكرية
بكره اللى خرجنا من تحقيقات امن الدولة ... ودخلنا في محاكمات عسكرية
بكره القانون اللى بيتطبق بحزم على اى شاب بيحلم او عامل معتصم لمطلب ....و بيتنسى ويتزوق بالشهامة والكرم والاخلاق عشان يتحول لعفو لناس تانية
بكره اللى لسه مخلى الكبير بيتعالج في مستشفى شرم ... والصغير مرمى في عنبر في القصر العينى .ده اذا حد عبره ووداه هناك
بكره العدالة الاجتماعية لو هى دى .... بكرهها لو هتساوى بين القاتل والمقتول
بكره الثورة اللى خليتنا نوصل لظروف اقتصادية اصعب من ايام النكسة ... على حد تعبير المشير
بكره الثورة اللى مات واتصاب بسببها ناس كتير ... عشان يوصلوا رسالة تغير لباقى الناس الحية في مصر
وكل اللى طلعوا بيه ... استكر 25 يناير على العربية .. او اغنية يا بلادى على الموبايل
ماتو والناس برده ماتغيرتش ومش عايزه تتغير
بس انا سمعت كده ان في ناس راجعة تانى التحرير يوم 27.. معترضة نفس اعتراضى ... كانوا معايا في ال18 يوم. ومستعده تقف زى الاول واكتر عشان ثورتنا تكمل .ومش خايفة من حاجة ولا من حد ..
الحاجة الوحيدة اللى خايفين منها بعد ربنا ... خوفهم ان دم الشهيد يروح هدر .... وان المصابين مايشوفوش تغيير في مصر يعوضهم الخسائر اللى خسروها .... خوفهم ان حلمهم وحلم اللى ماتوا ميتحققش
والغريب ان في ناس معترضة وشايفاها التفاف على رأى اغلبية
طب هو راى الاغبية ايه في المحاكمات !!!
راى الاغلبية ايه في عمداء ورؤساء الجامعات!!!
راى الاغلبية ايه في المحافظين والمجالس المحلية!!!
راى الاغلبية ايه في المعتقلين من ايام الثورة لغاية دلوقت من الشباب !!!!
واللى بيتحاكموا محاكمة عسكرية!!!
رايهم ايه في جلسات الحوار الوطنى اللى فيها ناس من الوطنى !!!!
وبرده القرارات بتطلع من غير استشاره!!!
واذا كان كل اللى هامم الاغلبية الحفاظ على رأيهم في الاستفتاء بـــ"نعم"
فاحب افكرهم ان واحد اعترض على راى الاغلبية هو المجلس العسكرى
لان السيناريو اللى اتنفذ ده بعيد كل البعد عن سيناريو نعم
اذا كان كل اللى هامم الاغلبية نعم بس ... ففى ناس تانية هاممها حجات اكتر من كده بكتير
ناس هاممها ان الثورة اللى خليتك تعرف تقول رأيك في استفتاء... تكمل ويبقى كل استفتاءاتنا وانتخابتنا اللى جايين كده
يوم 27 مايو ... مش ثورة تانية .... ده هي نفس الثورة الاولى .. الثورة الاولى اللى لسه مكملتش
يوم 27 مايو ... هو اخر فرصة ليا تثبتلى ان انا ماتخدعتش ولا حاجة ... وان الثورة اللى انا عايزها هاتتحقق ...
.................اخر فرصة تثبتلى ان انا مش بكره الثورة
