حاورينى يا طيطه على مسرح الجلاء

حاورينى يا طيطه .. دى لعبه بس ملعبتهاش قبل كده , واضح إنها لعبة شد وجذب ومكر وخداع من حاورينى , أما طيطه فده تقريبا أسم شخص أو مكان ومذكر الطيطه طيط .

وده نفس إللى فهمته من بيانات المجلس العسكرى الـ 60 والـ 61 من أجل دعوة ائتلافات شباب الثوره على حد كلامه للحوار وعرض المطالب وتحقيق التوافق الوطنى حسب كلام البيان شوفه هنا

دعوة المجلس العسكرى دعوه مشبوهه هدفها إيصال عدة رسائل للشعب
أولها أن شباب الثوره مختلفين فيما بينهم ومتناحرين ولا يجمعهم شئ وهو جاى بسلامته يحقق التوافق الوطنى والأجماع ده .

الرساله التانيه إللى بيحاول المجلس يوصلها للشعب هى إنه بيقعد مع الشباب وبيتحاور معاهم وبيسمع كلامهم وطالما فتحنا باب الحوار يبقى نقفل باب الميدان والتظاهر .
وده نفس إللى كان بيحاول يعمله الحزب المحلول جددوا طرقيتكم الله يكسفكم .

أعتراضى الأساسى على موضوع الدعوة للحوار والتحاور وعرض المطالب فى حفلة المجلس العسكرى تتلخص فى أنه الثوره لا تعرض مطالبها وأوامرها إلا فى ميادينها فعنوان الثوره ميدانها وليس مسرح أو حفلة أو جلسة حوار ده غير أن مطالب الثوره لا تحتاج لتوافق وطنى فالتوافق الوطنى عليها شرعيته مستمده من شرعية الميدان , عندك المطالب التوافقيه للثوره وللميدان إللى لم يتحقق منها أى شئ حتى الأن روح حققها وبعدين تعالى نتكلم ونقعد ونتناقش فى إدارة البلاد والخروج من الفتره الأنتقاليه وتريحنا من طلتك البهيه فى العمليه السياسيه .

محاولات جذب الشباب للحوار حول المطالب مرفوض مرفوض مرفوض 3 مرفوض مرفوض من هنا للميدان
لأنه محاولة لإبعاد الشباب عن الميدان وإلتفاف على المطالب إللى هى لا تقبل التناقش والحوار .

حد ممكن يقول إنهم عايزيين يسمعوا الشباب ومطالبهم !!
يا سيدى الفاضل صوت الشباب فى الميدان مسموع ده لو حتى عيل صغير عدى من جمب الميدان فى يوم جمعة حيعرف إيه هى المطالب التوافقيه وإيه هى أوامر الثوره المصريه إللى لسه متحققتش .

حد تانى ممكن يقول إنى سودوى قوى وظالم العسكر ودعوتهم !!
يا سيدى المجلس العسكرى مش بيلعب عليك أنت ولا على الشباب المجلس المهم عنده هو رسايله للشعب علشان يضمن سكوتهم وإنه يظهر شباب الثوره قدامهم مختلفين وإنه عمل إللى عليه ودعاهم للحوار والتوحد .


رسالة أخيره :-
عايزين تحققوا مطالب الثوار أسمعوها فى الميدان , الثوره ولدت وستعيش وتستمر فى الميدان ولن تذهب لمسارح وحفلات لتشارك فى مسرحيه جديده من الضحك على الثوره وأهدافها . والله الموفق

يعنى إيه نظم إنتخابيه وقوائم أنتخابات ؟؟! بص يا سيدى

النظم الأنتخابية :-
هى الطرق والأساليب المستعمله لعرض المترشحين للمجالس النيابيه "البرلمانات" برامجهم على الناخبين
وكذلك فرز الأصوات وتحديد النتائج .

أولاً : الأساس القانونى للأنتخابات :-
ورغم إن هذه النقاط أكاديميه ونظريه لكن مهم نفهم إيه الأساس والتكييف القانونى للأنتخابات .

تنوع التكييف القانونى للأنتخابات عند فقهاء القانون إلى نوعين ( وظيفة , حق ) حسب أعتناق نظريتى سيادة الأمه أو سيادة الشعب كما يلى :

الأنتخابات وظيفه حسب نظرية سيادة الأمه : حيث أن صفة الناخب تعتبر وظيفة عامة لا يجوز لأي فرد الإدعاء بحق فيها وهذه الوظيفه يمنحها المجتمع على النحو الذي تمليه عليه مصلحته ولو شاء أن يجعل هذه الوظيفه إجباريه فلا شئ فى نظرية سيادة الأمه يمنعه .
لكن فيه مشكله هنا : أن القيد الأنتخابى هنا أصبح يتم عن طريق الأقتراع المقيد وده أدى لوجود طبقتين من المواطنين طبقة المواطنين السلبيين ودى فيها المواطنين المتمتعين بالحقوق المدنيه دون الحقوق السياسيه والطبقة الثانيه طبقة المواطنين الإيجابيين النشطاء وهنا يتمتعون بالحقوق السياسيه والمدنيه نتيجه لنشاطهم ومشاركتهم .

الأنتخابات حق شخصى حسب نظرية سيادة الشعب : ويذهب هذا الرأى بناء على نظرية سيادة الشعب إلى أن الانتخاب حق شخصي لكل مواطن باعتباره حقا طبيعيا لا يجوز أن ينزع أو ينقص منه.

الانتخاب وظيفة وحق : وهذا الأتجاه يقول أن الأنتخابات حق ووظيفه فى نفس الوقت وتعليل ذلك أن الأنتخابات حق يذهب للتأكيد على وجود بعض الحقوق الطبيعية للفرد والتى لا يجوز للدولة أن تمسها أو تنتقص منها لأنها تسمو على القانون الوضعى , أما قوله بأن الأنتخابات وظيفه فمرد ذلك أنها إجباريه وليست إختياريه فعلى المواطن أداؤها وإلا تعرض للمسئولية الجزائية ممثله فى غرامه مالية فى أغلب الأحيان .

ثانياً : الطرق الأنتخابيه وأنواعها :-

يمكن تقسيم الطرق الأنتخابية من أكثر من ناحيه واحده وهى :

1 : الأقتراع المقيد والأقتراع العام :-

أساس هذا التقسيم هو السؤال الأتى : هل الأنتخابات مفتوحه لكل المواطنين ؟؟

فالأقتراع المقيد : هو تقييد حق الأنتخاب بشروط معينه كتوافر نصاب مالى معين أو قسط من التعليم أو يكون منتمى لطبقة إجتماعيه معينة !! وهذا النوع يعتبر أقل ديمقراطية حيث أنه يخل بالمساواه بين المواطنين ويقود التفرقه السياسيه بينهم على أساس طبقى أو مادى .

والأقتراع العام : هو النظام الذى لا يشترط أى شروط خاصه لمنح المواطنين حق الأنتخاب والترشح , لكن لا تعتبر من قبيل الشروط الخاصه مثلاً الشروط التنظيمية مثل بلوغ سن معينه أو التمتع بجنسية الدوله أو التمتع بقوى عقليه كامله .

2 : الأنتخاب الفردى والأنتخاب بالقائمة :-

الأنتخاب الفردى : هو تقسيم الدولة إلى عدة دوائر أنتخابيه بقدر عدد النواب المراد انتخابهم وعلى ذلك يكون لكل دائرة انتخابيه نائب واحد فقط ينتخبه سكانها ولو تقدم عدة مرشحين فى دائره واحده فلا يجوز للناخب أن يدلى بصوته لأكثر من مرشح , وفى مصر تقوم الدائرة الأنتخابيه على أختيار نائبين ولكن بشرط توافر نسبة الـ 50% عمال وفلاحين .

الأنتخاب بالقائمه : وفيه يقلل من عدد الدوائر الانتخابية فليس شرطا أن تكون الدوائر متساوية فقد يخصص لكل دائرة عدد من النواب يتوافق وعدد سكانها يجري انتخابهم في قائمة فيقوم المنتخبون باختيار المترشحين من بين الأسماء المدرجة ضمن القائمة أو القوائم الانتخابية التي تختلف باختلاف الأنظمة .

ويطبق هذا النوع في عدة صور :

أ - القائمة المغلقة : وفيها يكون من حق الناخب الأختيار من بين القوائم المتنافسه دون حق الشطب والأختيار من داخل هذه القوائم بمعنى قبول القائمه كلها أو رفضها كلها .

ب - القائمة الممزوجة : وهنا الناخب غير مقيد بقائمة بعينها وله الحريه فى أن يشكل القائمة التى يراها مناسبه من بين القوائم المتنافسه أو من قائمة واحده .

3 : الأقتراع العلنى والأقتراع السرى :-

الأقتراع العلنى : هو أن يختار الناخبين ممثليهم بشكل علنى ومكشوف أمام الجميع بحيث يمكن معه معرفة تلك الأختيارات , وكان هذا هو الأسلوب المحبذ والمتبع إلا أنه كان يجعل من الناخبين عرضه لأنتقام ذوى النفوذ والسلطة .

الأقتراع السرى : هو أن يدلى الناخب بصوته دون أن يكون لشخص أخر علم بذلك وتميل الآن أغلب الديمقراطيات العالميه لهذا النظام نظراً لما يحققه من نزاهه وبعد عن ضغوطات الأقتراع العلنى .

4 : الأنتخاب المباشر والأنتخاب الغير مباشر :-

الأنتخاب المباشر : هو أن يقوم الناخب بأختيار ممثليه ونوابه مباشرة بنفسه ودون وساطة من أحد .

الانتخاب غير المباشر : هو أن يقوم فيه جمهور الناخبين باختيار وانتخاب مندوبين عنهم ليتولوا اختيار ممثليه من المترشحين فهو يقوم على درجتين .

ثالثاً : أساليب تحديد النتائج :-

تحدد نتائج الانتخابات بأسلوبين اثنين هما نظام الأغلبية ونظام التمثيل النسبي وهذان النظامان يتعلقان إذن بنتيجة الانتخابات وليس بإجراء التصويت، وبالتالي فإن أيهما سيطبق سوف يؤثر على كيفية توزيع المقاعد على المترشحين .

1 : نظام الأغلبية :-

يقصد بنظام الأغلبيه أن يفوز المرشحون الحاصلون على أعلى الأصوات فى الدائرة بالأنتخابات أما من يليهم من المرشحين فى الترتيب فلا يحصلون على شئ ويستوى ذلك فى الأنتخاب بالقائمة أو الأنتخاب الفردى .

مميزاته : نظام الأغلبية يحقق الانسجام داخل المجالس النيابية بما يوفره من إمكانيات التعاون والتوافق الشيء الذي يبعد عنها الصراعات التي تؤدي في غالب الأحيان إلى تعطيل عملها، هذا فضلا على بساطة الانتخابات في ظله إلا أنه لا يكون في صالح الأحزاب الصغيرة .

عيوبه : يبدو أقل ديمقراطية من نظام التمثيل النسبي حيث يكفل الفوز فقط لمن حصل على الأغلبية من الأصوات دون إقامة أي وزن للأصوات الأخرى سواء كانت فردية ّأو حزبية مما يجعل الفائز يحصل على كل المقاعد استنادا إلى القاعدة أن الفائز يكسب الكل، وهو بهذا يؤدي إلى ظلم الأقليات التي لا تتمكن في أغلب الأحيان من الفوز بالأغلبية وإنما كل ما تستطيع تحقيقه هو الحصول على نسبة بسيطة من الأصوات دون أن تؤهلها إلى اكتساب مقعد، الأمر الذي يمهد للأحادية التي تعتبر مقدمة الاستبداد .

ويأخذ نظام الأغلبية إحدى الصورتين الرئيستين : الأغلبية المطلقة والأغلبية النسبية أو البسيطة :

الأغلبية المطلقة : تعني الحصول على أكثر من نصف عدد أصوات الناخبين الصحيحة التي اشتركت في الانتخابات، أو كما هو متعارف عليه خمسين في المائة زائد صوت واحد (50 + % 1)، والتي يفترض أن يحصل عليها المرشح الفائز أو القائمة، أما إذا لم يحصل أحد المرشحين أو إحدى القوائم على الأغلبية المطلقة للأصوات الصحيحة المعطاة فإنه يجب إعادة الانتخابات ولذلك يسمى نظام الأغلبية المطلقة أحيانا بنظام الأغلبية على جولتين، وهنا يسمح القانون إما بإعادة الانتخاب بين الاثنين الحاصلين على أعلى الأصوات، أو يسمح بإعادتها بين الذين حصلوا على نسبة معينة، فهنا يتعدد المرشحون فلا مفر من الاكتفاء بالأغلبية النسبية .

الأغلبية البسيطة : وفيها يكون المرشح الفائز هو الذي حصل على أكثر الأصوات بغض النظر عن مجموع الأصوات التي حصل عليها باقي المرشحين الآخرين.
فلو كان هناك دائرة انتخابية عدد الناخبين الذين أدلوا بأصواتهم كان (7000) ناخب، حصل المرشح الأول على (2500) صوت والمرشح الثاني على (2000) صوت، والثالث على (1500) صوت والرابع على (1000) صوت فإن الفائز هو المرشح الأول ونفس الشيء إذا تعلق الأمر بقائمة.
ونظرا لبساطة طريقة تحديد الفائز فإننا لا نتخيل إعادة الانتخاب بسبب حسم النتيجة من الجولة الأولى ولذلك يسمى هذا النظام بنظام الجولة الأولى .

2 : التمثيل النسبى :-

وفيه تحصل كل قائمة متنافسة على عدد من المقاعد المخصصة للدائرة الانتخابية حسب نسبة الأصوات التي حصلت عليها في الانتخابات، ولذلك فإن هذا النظام لا يمكن تصور تطبيقه إلا في ظل الانتخاب بالقائمة حيث يكون فيه توزيع المقاعد بين القوائم المتنافسة أما في الانتخاب الفردي فلا يمكن ذلك لأنه يدور حول منصب واحد يتعذر تقسيمه.
فلو فرضنا أن هناك دائرة انتخابية تنتخب 10 نواب تتنافس حولها ثلاث قوائم فجاءت نتائجها كمايلي:
القائمة (أ) لها 60 % فلها 06 مقاعد.
القائمة (ب) لها 20 % فلها 02 مقعدان.
القائمة (ج) لها 20 % فلها 02 مقعدان.
ولكن الواقع العملي لا يكون دائما بهذه السهولة والبساطة فقد تثور صعوبات في كثير من الأحيان في توزيع البواقي أي بعد التوزيع الأولي تبقى مقاعد غير موزعة وأصوات لم يستفد منها فكيف يتم توزيع هذه البواقى ؟؟! .

أ‌- على مستوى الدائرة الانتخابية-:

طرق توزيع المقاعد :-

يتم توزيع المقاعد في نظام التمثيل النسبي بين القوائم المتنافسة بالطرق التالية

:
1 : المعامل الانتخابي : يتم استخراج المعامل الانتخابي بتقسيم مجموع الأصوات الصحيحة المعبر عنها على عدد المقاعد المراد شغلها في الدائرة الانتخابية والنتيجة المحصل عليها هي التي تسمى المعامل الانتخابي، ومثال ذلك:
الأصوات الصحيحة المعبر عنها = 300.000 صوت.
عدد المقاعد = 06.
المعامل الانتخابي هو 300.000÷ 06 = 50.000.
ثم بعد ذلك نقوم بتقسيم عدد الأصوات التي حصلت عليها كل قائمة على هذا المعامل الانتخابي فنحصل على المقاعد التي ستعود إليها مع إمكانية وجود أصوات لها متبقية، ومثاله:
القائمة (أ) حصلت على 120.000 صوت فعدد مقاعدها 120.000 ÷ 50.000 = 02 (مقعدان) والباقي 20.000 صوت، وهكذا نتابع نفس العملية مع باقي القوائم الأخرى .

2 : طريقة العدد الموحد : العدد الموحد يحدده القانون حيث يبين عدد الأصوات التي يجب الحصول عليها في الدائرة الانتخابية من أجل الحصول على مقعد فلنفرض أن هذا العدد هو 60.000 صوت فلو أن القائمة (أ) حصلت على 140.000 صوت فإنها ستحصل على مقعدين ويبقى لها 20.000 صوت، وهكذا الأمر مع القوائم الأخرى.
3- طريقة المعامل الوطني: يتم الحصول على المعامل الوطني عن طريق تقسيم مجموع الأصوات الصحيحة المعبر عنها على المستوى الوطني على عدد المقاعد النيابية المراد شغلها والناتج هو المعبر عنه بالمعامل الوطني، ثم نقوم في كل دائرة انتخابية بتقسيم عدد الأصوات التي تحصلت عليها كل قائمة على هذا المعامل الوطني لتحديد عدد المقاعد التي تعود إليها في الدائرة، فلو أن عدد الأصوات الصحيحة المعبر عنها على المستوى الوطني هو 1.500.000 صوت وعدد المقاعد المراد شغلها 120 مقعدا فإن المعامل الوطني هو 1.500.000 ÷ 120 = 12500، فإذا تحصل الحزب (أ) على 150.000 صوت فإن المقاعد التي ستعود له تكون كما يلي:
150.000 ÷ 12500 = 12 (مقعد) الباقي 0 صوت، وهكذا دواليك .

توزيع البواقى :-

كيف ندخل في الاعتبار الأصوات المتبقية لكل قائمة بعد التوزيع الأولي للمقاعد؟
إن الأصوات التي تحصل عليها كل قائمة من القوائم الانتخابية أيا كانت الطريقة المتبعة في توزيع المقاعد فإن خارج القسمة سوف يجعل هناك بعض الأصوات حصلت عليها القائمة ولم تستفد منها فهذه الأصوات المتبقية كيف ندخلها في الاعتبار؟
إذا كان التوزيع على مستوى كل دائرة انتخابية نتبع الخطوات التالية.
لا بد من الأخذ بطريقة المتوسط الانتخابي، ثم نستخدم أحد النظامين :
نظام الباقي الأقوى
نظام المتوسط الأكبر
وهو ما تعتمد عليه التشريعات التي لا تخرج استخداماتها عن أحد النظامين المذكورين.
ومثال ذلك:
أن هناك دائرة انتخابية خصص لها خمس مقاعد.
وعدد الأصوات الصحيحة المعبر عنها كان 200.000 صوت موزعة على أربع قوائم كما يلي:
القائمة (أ) حصلت على 85000 صوت.
القائمة (ب) حصلت على 60000 صوت.
القائمة (ج) حصلت على 30000 صوت.
القائمة (د) حصلت على 25000 صوت.
كيف يتم توزيع المقاعد الخمس على هذه القوائم الأربع؟
نقوم أولا بتوزيعها على أساس المتوسط الانتخابي.
ثم نوزع البواقي على أساس الباقي الأكبر أولا.
ثم نعمد إلى التوزيع على أساس المعدل الأقوى ثانيا.

أولا: التوزيع الأولي للمقاعد: نستخرج المعامل الانتخابي

عدد الأصوات الصحيحة المعبر عنها تقسيم عدد المقاعد المراد شغلها فهو إذن:
200000 ÷ 5 = 40000 صوت فيكون التوزيع كما يلي:
القائمة (أ) : 85000 صوت ÷ 40000 = مقعدان.
القائمة (ب) 60000 صوت ÷ 40000 = مقعد واحد.
القائمة (ج) 30000 صوت ÷ 40000 = لا مقعد.
القائمة (د) 25000 صوت ÷ 40000 = لا مقعد.
فالتوزيع الأولي شمل ثلاث مقاعد من أصل خمس مقاعد بقي إذن مقعدان كيف يتم توزيعهما.

ثانيا: توزيع البواقي على أساس نظام الباقي الأقوى.

إذا تأملنا المثال السابق نجد أن كل القوائم لم تستفد من أصوات قد تحصلت عليها إما كليا أو جزئيا فكيف يمكن لها استغلالها.
القائمة (أ) : 85000 صوت ÷ 40000 = مقعدان وبقي لها 5000 صوت.
القائمة (ب) 60000 صوت ÷ 40000 = مقعد واحد بقي لها 20000 صوت.
القائمة (ج) 30000 صوت ÷ 40000 = لا مقعد بقي لها 30000 صوت.
القائمة (د) 25000 صوت ÷ 40000 = لا مقعد بقي لها 25000 صوت.
فمن خلال إلقاء نظرة على البواقي نجد أن:
القائمة (ج) لها باقي أكبر تحصل على مقعد.
والقائمة (د) لها ثاني باقي أقوى تحصل على مقعد.
فتكون النتيجة النهائية كما يلي:
القائمة (أ) مقعدان، القائمة (ب) مقعد، القائمة (ج) مقعد واحد، القائمة (د) مقعد.
فهذا النظام يأتي في صالح الأحزاب الصغيرة فنلاحظ كيف أن القائمة (د) تساوت مع القائمة (ب) على الرغم من فارق الأصوات المعتبر بينهما .

ثالثا: نظام المعدل الأقوى :

في هذا النظام نقوم بتقسيم عدد الأصوات التي حصلت عليها كل قائمة على عدد المقاعد التي أخذتها زائد مقعد فهنا نتخيل أن كل قائمة تحصلت على مقعد إضافي والحاصل من القسمة يسمى بالمعدل والقائمة التي تتحصل على أعلى معدل هي التي تأخذ المقعد المتبقي، ولنأخذ المثال السابق:
القائمة (أ) حصلت على 85000 صوت لها 02 مقعدان زائد واحد = 03.
القائمة (ب) حصلت على 60000 صوت لها مقعد واحد زائد واحد = 02.
القائمة (ج) حصلت على 30000 صوت لها (0) صفر مقعد زائد واحد = 01.
القائمة (د) حصلت على 25000 صوت لها (0) صفر مقعد زائد واحد = 01.
استخراج معامل كل قائمة.
القائمة (أ) : 85000 صوت ÷ 03 = 28.333.
القائمة (ب) 60000 صوت ÷ 02 = 30000.
القائمة (ج) 30000 صوت ÷ 01 = 30000.
القائمة (د) 25000 صوت ÷ 01 = 25000.
المعامل الأكبر يوجد عند القائمة (ب) والقائمة (ج)، وبالتالي فإن النتيجة النهائية تكون كالتالي:
القائمة (أ) : 02 مقعدان.
القائمة (ب): 02 مقعدان.
القائمة (ج): 01 مقعد واحد.
القائمة (د): لا تحصل على أي مقعد.
فهذا النظام يكون في صالح الأحزاب الكبرى فنلاحظ كيف أن القائمة (د) لم تأخذ أي مقعد على الرغم من أنها في النظام الأول قد تحصلت على مقعد، لذا يعتبر الكثير أن هذا النظام هو الذي يجعل عدد الأصوات يتناسب فعلا مع عدد المقاعد النيابية، فهو يحقق نتائج أدق من الناحية الحسابية لذا فهو النظام المفضل والأكثر استعمالا في توزيع النتائج .

ب : التوزيع على المستوى الوطني:-

هنا نقوم بجمع بقايا الأصوات لكل قائمة على المستوى الوطني بعد التقسيم الأولي، ثم تقسم هذه الأصوات المتبقية على العدد الموحد الذي يكون قد حدده القانون والنتيجة تعطينا عدد المقاعد التي تحصل عليها كل قائمة على المستوى الوطني، ومثال ذلك العدد الموحد هو 50.000 صوت للحصول على مقعد، وهناك قائمة حصلت على 175000 صوت فتستفيد حسب الرقم الموحد من ثلاثة مقاعد ويبقى لها 25000 صوت فتجمع بقايا أصواتها على مستوى كل الدوائر الانتخابية فيكون لها مقعد أو مقاعد إضافية بقدر نصيب ماتبقى لها من الرقم الموحد، فتحصل هذه القائمة على مقاعد على مرحلتين الأولى على مستوى كل دائرة انتخابية والثانية على المستوى الوطني .

مميزات وعيوب التمثيل النسبي: قيل أن نظام التمثيل النسبي هو الأنسب لتمثيل الأقليات والأحزاب السياسية الصغيرة في المجالس النيابية فهو أكثر تماشيا مع النظام الديمقراطي لأنه يضمن تمثيلا أوسع وهو بذلك يحول دون استبداد المجالس النيابية لوجود المعارضة، ولكن بالمقابل فهو ينم عن تعقيدات في العملية الانتخابية إضافة إلى كثرة الأحزاب السياسية وتعددها مما ينعكس سلبا على المجالس النيابية ويعوقها عن أداء مهامها كما ينعكس كذلك على العلاقة بينها وبين السلطة التنفيذية .

أنا كده خلصت وده خلاصة دراستى للعملية الأنتخابية فى حقوق وأجزاء كثيره من الشرح مقتبسه من مصادر قانونيه .

(أسوأ ثمانية مقولات قالها صبحى صالح عضو الاخوان المسلمين وعضو لجنة تعديل الدستور

كتب : هانى حمد

هذه قائمة بأغرب وأسوأ ثمانية تعليقات قالها صبحى صالح .. انوى زيادتها كلما صدرت منه المزيد من الدرر النفيسة

01- "كل خصوم الاخوان من كل الاتجاهات هم على نظرية قوم لوط لسان حالهم "اخرجوا اهل لوط من قريتكم انهم اناس يتطهرون

يمكنك مشاهدة تشبيه خصوم الاخوان من كل الاتجاهات بقوم لوط فى الدقيقة 7:00 من الجزء الثالث! الكوميدى ان البيه الافوكادو بيرجع فى الجملة اللى بعد الشتيمة دى يقول السباب وسيلة العجزة

02- !!تخيل لو لم يقم الاخوان .. كان زماننا الان رحم الله الاسلام

يمكنك مشاهدة دور الاخوان فى حفظ الاسلام من الانقراض فى الدقيقة 8:43 وكأن الله سبحانه وتعالى لم يقل فى كتابه الكريم

"إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُونَ"

03- فى سنة 26 شكك طه حسين فى النص القرانى والقصص القرانى وقام بحملة على القران وعلى الشريعة وعلى الخلافة.. يعنى حملة على القران والشريعة والخلافة يتكلم بها رواد الامة زى على عبد الرازق وطه حسين واحمد لطفى السيد وسلامة موسى وجورج زيدان.

يمكنك مشاهدة تكفير طه حسين ورفاقه فى الدقيقة 7:35

04- ميجيش أخ فلوطة(اخوان مسلمين) يقوللى اتجوز من خارج الجماعة ..طب والاخت(الاخوانية) اللى احنا عاملينها دى نعمل بيها ايه؟؟ نشحتها؟؟ يجب على كل اخ اخوانى ان ينصر الله على نفسه حتى ينصرنا والزواج من اخت يحقق هذا .. لأن عندما يتزوج الاخ من عندنا اخت من عندنا يطلعولنا اخوة بالميراث. "اتستبدلون الذي هو ادنى بالذي هو خير"

يمكنك مشاهدة نظرية تصنيع الاخوة عن طريق زواج الاخوان بالاخوات فى هذا الكليب اكن الرسول صلى الله عليه وسلم كان اثما عندما تزوج من ماريا القبطية والعياذ بالله

05- هناخد حقنا بالدراع لو مخدناهوش بالمحكمة .. اما ناخد حقنا بالكامل واما ناخده فى الشارع .. احنا ماتلنا 93 واحد

(بيعد شهداء الاخوان بس فيما يبدو)

يمكنك مشاهدة تهديد القضاء فى حال عدم صدور احكام ترضي الاخوان فى هذا الكليب

06- نحن كجماعة لا نعترف بمفاهيم المسلم ليبرالى ومسلم علمانى ومسلم يساري، نحن لا نعرف إلا مسلم يكفيه دينه عمن سواه من المناهج

يمكنك قراءة تصريحات صبحى صالح التى يكفر فيها المسلمين الليبراليين واليساريين والعلمانيين .. ويقصر اعترافه باعتناق الاسلام على من يكتفى فقط بالدين ولا تنظر لسواه.

http://www.youm7.com/News.asp?NewsID=417240

07- انا الذى دفعت ثمن الثورة .. احرم من ثمرتها؟ انا اللى اتحبست .. انا اللى اتحاكمت محاكمة عسكرية .. انا اللى قدمت شهداء .. انا اللى اتفتش بيتى كل يوم .. انا اللى اتصنت عليا كل يوم .. انا اللى اتعرفت اسرار بيته كل يوم .. انا اللى اتفتحت ادراج بيتى فى الملابس الداخلية لمراتى وبناتى .. انا الذى دفعت الثمن احرم من المشاركة فى الثمر؟ هل هذا عدل هل هذا دين؟

يمكنك مشاهدة صراخ صبحى صالح وادعاؤه الفضل لنفسه على مصر كلها فى الدقيقة 6:40

08- لا تستطيع قوة على الأرض أن تشطب الاخوان من على الخريطة السياسية ابدا .. سنشارك وسنفوز .. لأننا حراس دين الله

يمكنك مشاهدة تنصيب صبحى صالح لنفسه ولجماعته المدافعين الحصريين عن دين الله فى الدقيقة 7:40

ويبقى السؤال بعد كل هذا .. لماذا لا يدين الاخوان هذا التصريحات؟ ولماذا يختار المجلس العسكرى هذا الشخص فى لجنة تعديل الدستور ؟ ولماذا يصفق بعد كل تصريح من هؤلاء الاخوان ويهللون الله اكبر ولله الحمد؟

يوم 27 مايو ..لأن هذه مصر وليست قرقيزيا

كتب : محمود سامى

قرقيزيا

فى قرقيزستان او قرقيزيا..قامت ثوره فى 2005 سميت بثوره ال"التوليب" نسبه لزهره التوليب..وكانت من اهم مطالبها او من الاسباب التى قامت من اجلها "الفقر ..والبطاله..والديكتاتورية" فأسقطت الثوره الديكتاتور عسكر أكاييف وجاءت الثوره بالرئيس باكييف إلى الحكم، من خلال انتخابات ديمقراطية شهد الجميع بنزاهتها..وبعد الثوره بخمس سنوات وجد الشعب ان مطالب الثوره لم يتم تحقيقها وكرامه المواطن القرقيزى اصبحت فى الحضيض كما كانت..فخرجوا فى الشوارع مره اخرى فى 6 ابريل 2010..فلم يكن من الرئيس باكييف الذى جاء الى الحكم بواسطه المتظاهرين والثوار الا انه اطلق الرصاص على المتظاهرين وتم قتل 83 مواطن وآلاف الجرحى !ا

مصر

يتشابه الموقف بين ثوره الشعب المصرى وثوره قرقيزيا الى حد ما..ولكن الذي سيحسم هل سيكون مصير ثوره اللوتس هو نفس مصير ثوره التوليب هو تحركاتنا الفتر القادمه ..هل سننبطح ونستقر فى الحضيض مره اخرى؟ او ستظل ثورتنا مستمره ..الشعب هو الذي يقرر فأرجوكم حرضوا الشعب ان لا يهداً حتى يُكمل ثورته

بعد 4 اشهر وليست 5 سنوات من الثوره..يتم اطلاق الرصاص على المتظاهرين مره اخرى امام السفاره ومازال المواطن يعالج من الرصاصه التى استقرت فى الرأس ! وبعد الثوره ب4 شهور فقط يتم القبض على شباب لأنهم يدعون المواطنين للنزول يوم 27..والشرطه تعمل على ذلك بفاعليه..وكأنها ترى النشطاء ولا ترى البلطجيه!ا

فبعد 4 اشهر من الثوره المصريه "ثوره اللوتس" يتم اعاده انتاج واستخدام شعارات مثل قله مندسه على مُطلقى الدعوه ليوم 27 مايو..وتُهان كرامه المصريين بصياح"كله على ركبه" ويتم نشر اكاذيب عن الاقتصاد لتُثير الرعب والفزع..و يتم فصل طلاب لأنهم عبروا عن رفضهم لعميد كليتهم الذى كان جزء من النظام البائد..ويتم صياغه القوانين كقانون الاحزاب..وقانون مباشره الحقوق السياسيه بدون اى حوار مجتمعى وبدون اى مناقشات حول قوانين تُسير الحياه السياسيه فى المستقبل

الضغط المستمر هو الضمانه الوحيده

انا على اقتناع تام ان بعد اى ثوره لابد من الضغط المستمر للحفاظ على المكتسبات وحتى يحصل الشعب على مكتسبات اكتر

لكن اللى بيحصل فى مصر ان مكتسبات الثوره لا ترقى لمستوى التضحيات التى دفعها هذا الشعب العظيم..بالعكس المكتسبات اللى اكتسبها الشعب بيخسر كل يوم منها مكتسب..فمكتسب حق التظاهر والتجمع..يأتى من بعده قانون تجريم الاحتجاجات..مكتسب الحريه فى الاعلام يتم خسارته..فبعد ان تفائلنا خيراً بتغيير بعض قيادات الاعلام يأتى اليوم الذى يُقطع فيه الارسال لان المتحدث انتقض سلوك او قرار معين من المجلس العسكرى..بعد ان تخصلنا من هؤلاء الحمقى الذين يتهمون كل من يختلف معهم ومن يطالب بالديمقراطيه بأنه خائن وعميل وصاحب اجنده واتهام الثوار بأنهم يقبضون الدولارات فى اشاره لخيانتهم ..هذه هى الاتهامات الذى وزعها اعضاء المجلس "شاهين وعتمان" ..ومن ضمن المكتسبات ..او ما ظننا انه مكتسبات للثوره هو المصارحه والشفافيه..فأذا بالمجلس العسكرى"بقصد او بدون" ينشر الاكاذيب حول الوضع الاقتصادى وهذه الاكاذيب الذى وقف ضدها كثير من الاقتصاديين سواء خارج السلطه او داخلها ..وفندوا تلك الاكاذيب بالارقام والاحصائيات..فكانت الاكاذيب عن الوضع الاقتصادى هدفها الاول هو منع الاحتجاجات ومنع المظاهرات ..وكنا نعتقد ان من المكتسبات هو ان لن يُثير احد اطياف الشعب ضد بعضهم..فأذا بأعلى رتبه فى المجلس يطالب المصريين للتصدى للأحتجاجات والمظاهرات؟ اى تصدى يقصد؟ وهل نعتبر هذا تحريض ضد المتظاهرين؟ وهل اذا حدثت مشاجرات او موقعه " جمل " اخرى..هل يكون من حرض المصريين ضد المتظاهرين هو المسئول الاساسى فيها؟

فالوقت الذى تدار بسرعه وحسم وحزم محاكمه من يتظاهر امام السفاره وفى الوقت نفسه هناك تباطؤ وبرود وتأجيلات فى محاكمه من قتل المتظاهرين ومن افسد الحياه السياسيه ومن اضاع عيون ابطال الثوره من المصابين؟

ومن بعد4شهور من ثوره كان من اهم من شعاراتها "كرامه انسانيه"والفارق الوحيد بين لحظة الثورة وكل السنوات الثلاثين السابقة لها هو استعاده المصرى لكرامته واعتزازه بمصريته..يهين ضابط متظاهرين مصريين ويهين كرامتهم ويشتمهم بأفظع الشتائم ويأمرهم ب "كلُّه على رُكَبه" ..فهذا تراجع لمكتسب من اهم مكتسبات للثوره

ومن بعد تلات شهور لم نتقدم خطوات فى اهم شعارات الثوره"عداله اجتماعيه" فحتى الآن لم يتم تنفيذ الحد الادنى للأجور..ففى جلسات عديده مع وزير الماليه سمير رضوان وضحنا له اقتراحتنا وحلولنا لوضع الحد الادنى للأجور ومن اهمها هو وضع الحد الاقصى لتمويل الحد الادنى فليس من المنطقى ان بعد ثوره كانت من شعاراتها " عداله اجتماعيه " يظل هناك فى وزارات وفى مؤسسات الدوله من يقبض مبلغ يقارب المليون جنيه..وفى نفس المؤسسه يقبض موظف 500 جنيه او 350 جنيه..ووضعنا حلول لها علاقه بأن يكون الحد الاقصى يكون 15 ضعف الحد الادنى..وكمصادر لتمويل الحد الادنى اقترحنا الصناديق الخاصه..وكانت الوعود للعمال قبل ان تكون لنا انه سيتم وضع الحد الادنى وتطبيقه فى اول مايو..ولكن لا حياه لمن تُنادى..ولا مايو لمن تنادى

ومن بعد ثلاث شهور من الثوره..مازال الانفلات الامنى"المتعمد" مستمر من جانب الشرطه..ولذلك لوجود قيادات فاسده فى جهاز الشرطه ..ومن المهين للثوره والثوره ان يظل المتهمون بقتل المتظاهرين فى مهام عملهم فى نفس وقت التحقيقات معهم..يعنى واحد زى فاروق لاشين..يتحاكم عليه الصبح..بعد الضهر ينزل الشغل او ينزل عند السفاره يأمر بضرب وسحل المتظاهرين..دا غير العناد الغير ضمنى بأن الشرطه لن تعود للشارع بفاعليه الا بنفس طريقتهم الماضيه..فوق رؤوس العباد يمتهنون كرامتهم..وكأن شعارهم نعود اسيادكم..او نترككم للبلطجيه كما صرح مدير امن القليوبيه..فلماذا حتى الآن هناك من يمارسون عملهم بالرغم من التحقيق معهم فى تهم قتل المتظاهرين؟ لماذا لم يتم عزل القيادات الفاسده بالشرطه؟

فشعاراتنا كانت يوم 25 يناير" تغيير..حريه..كرامه انسانيه..عداله اجتماعيه"

فلم يتم تغيير حقيقى..وتم الحد من الحريه وكأنها تُسلب..ومازالت كرامه المواطن تُهان..ولم يتم وضع اى خطوات لتطبيق العداله الاجتماعيه..لذلك ...انا نازل التحرير يوم 27

فهذه مصر..وليست قرقيزيا..ولن نسمح ان يتم الالتفاف على ثورتنا..فنحن مستعدون ان نفقد ارواحنا..قبل ان نفقد ما صنعناه وصنعه ابطالنا الشهداء والمصابين وكل من ضحوا من اجل مطالب وشعارات ثورتنا

الاستقرار والمستقرين

الثوره مستمره..وليذهب دعاه الاستقرار الى الجحيم..فنحن نعشق الاستقرار..ولكن ليس استقرارهم..فأستقرارهم هو استقرار الدود فى قاع صناديق القمامه..واستقرارنا هو ان نستكمل ما بدأه ابطالنا الشهداء والمصابين..عندها نستقر استقرار الصقور اعالى الجبال.. منتصرين .

أنا كرهت الثوره !!

كتبها محمد عاصى هنـــا

استنى بس كدة يا بتاع التحرير قبل ماتقتح قاموس الشتايم والتخوين وتسمعهولى لفظ لفظ

واستنى برده يا عاشق ميدان مصطفى محمود .. قبل ماتفتحلى دراعاتك وتقولى اخيرا عرفت الحقيقة وترحب بيا وسطكم

استنوا قبل اى حكم .. اقروا اسبابى .. لان اكيد مش زى مانتم فاهمين

انا اتخدعت في الثورة دى ... غسلولى دماغى ... فضلو قبل 25 يناير يحشوا دماغنا باحلام و مطالب وفهمونا اننا هننزل نضرب ويمكن نموت عشانها بس في الاخر هاتتحقق

وعرفوا يقنعونى باهميتها ووصلت لدرجة انى مستعد اعمل اى حاجة مقابل المطالب اللى بقت حلم شخصى

قالولنا ايه بقى يا سيدى ...خلونا نحلم بايه !!!!

اول هتاف كان "عيش ... حرية ... عدالة اجتماعية" ...

اقتنعت ان احنا فعلا نقدر نخرج من الكبت والقمع ... اننا نعرف يعنى ايه حرية فعلا .. اننا نسمع بعض ونحط كلامى على كلامك على كلامه عشان فكرة نخدم بيها مصر

وزاد اقتناعى ان مصر ممكن ترجع دولة عظمى كمان ... اقتصاديا واجتماعيا ... هنقدر نلغى الفقر ... هنقدر نلغى الجهل ونطلع جيل مش بس متعلم ويقدر يخدم مصر لأ كمان يخدم العالم كله ...

اقتنعت ان ممكن فعلا يبقى فيه عدالة ..... مفيش فجوات واسعة زى اللى موجودة دلوقت بين طبقة وتانية

اقتنعت فعلا ان هيبقى فيه عدل .... الكل واحد قدام القانون ... كل اللى بيغلط يتحاسب ... وخصوصا اللى بيقفوا قصاد نهضة مصر ويمنعوها من التقدم

بعدين قلت في نفسى .. طب ازاى هيبقى فيه عدل من غير ما نحاسب اللى موجودين وغلطوا دلوقت ... الى فضلوا عايشيين طول عمرهم بيرجعوا مصر لورا عشان مصالحهم الشخصية

اللى خلونى انزل انا وغيرى كتير نطلب بحاجات طبيعية ... حقوق مواطن ... محرومين منها من ساعة ماشوفنا الدنيا ... ويمكن نموت عشانها .وهى فى الاخر اصلا حقوق طبيعية لاى انسان !!!!!

الناس دى لازم تتحاكم ... الناس دى لازم تبقى اول خطوة واول مثال على مصر الجديدة العادلة .. مصر اللى مافيهاش حد اعلى من القانون .. مصر اللى انا اقتنعت اننا ممكن نحققها

و عشان ناكد على حلمنا ده والفكرة اللى اقتنعنا بيها .. لاقينا نفسنا بنقول .... يسقط يسقط حسنى مبارك ... الشعب يريد اسقاط النظام

دخلت معتقلات ... نمنا على الرصيف .... ناس فقدت عيونها ... ناس فقدت قدرتها على الحركة ... ناس فقدت حياتها ....بس فى الاخر الحلم اتحقق

وحصل اول اشارة لسقوط النظام بسقوط راسه .... او زى ما كنا فاكرين يعنى انها اول اشارة ... بدأنا بعدها نثبت اننا هنبنى مصر بادينا ..تنظيف الميدان والشوارع ... ودهن الارصفة ... حملات التنظيف في كل حته

وده تاكيدا على رغبتنا في بناء مصر جديدة فعلا مش مجرد روح انتقام من رموز قديمة....

يوم التنحى سألت نفسى هو فعلا كده خلاص النظام سقط ؟؟؟ .... هو فعلا كده عرفنا نخلص من الماضى ... وهو ده الوقت المناسب اننا نبص للمستقبل ونبدأ نبنى !!!

و جه الرد بسرعة فى بيان للمجلس العسكرى .... انه مع الثورة .. ومع شباب الثورة ... ووظيفته الاساسية في ادارة البلد هى التاكيد على المطالب بتاعتنا ....

كده خلاص بقى... نركز احنا في المستقبل .. والمجلس هيقوم بدورة في التخلص من الماضى

بس ثانية واحده كده ... ماهى كل حاجة حلوة اوى اهى ... ليه بتكره الثورة بقى !!!!

هقولك يا سيدى اصبر عليا بس ...قوم اعمل كوباية شاى وارجع كمل

الكلام اللى فوق ده كله لغاية يوم التنحى .. عدى بعد كده اكتر من اربع شهور لغاية يومنا الحالى ..

كنت فاكر ان هيبقى فيه فرق بين النظام القديم والجديد ...بس في الفترة دى الفرق مكانش بيدينى امل بالتغيير ... كان بيدينى يأس

كل يوم كنت باخد خبطة في دماغى من النظام الجديد "المجلس العسكرى" ..

خبطات تثبت اننا مش بنخلص من الماضى فعلا... ومش هانخلص ...خبطات رجعتنى من التفكير في المستقبل وخليتنى افكر فى اللى فات ..رجعتنى من حلم البناء وخلتنى ارجع تانى افكر في هدم الماضى

النظام القديم كان بيعامل اى مواطن ليه مطالب انه عميل مدسوس باجنده ..... النظام الجديد بيعامله على انه بلطجى !!!!

القديم بيطلع قرارات وقوانين مع نفسه من غير مايسمع حد ... والجديد بيسمع القوى السياسية في الحوارات الوطنية و سمع الشعب في الاستفتاء وبرده بيطلع القرار مع نفسه !!!!!

هى دي الديموقراطية اللى شاركت في الثورة عشانها !!!!!... هو ده معنى ان الشعب هو اللى بيحكم نفسه ..!!!!!

القديم كان بيتعامل مع المواطن على انه حيوان ملوش اي حقوق في الحياه .. والجديد بيتعامل معاه على انه عايز فلوس و بس ....فاكرنا عايزين من المحاكمات فلوسنا و بس

القديم ماكنش مخلينا نعرف فيه ايه بكرة ... والجديد بيديلنا بدل السيناريو عشرة ... بيديلنا حيرة ... زيادة على اننا مش عارفين برضه مش عرفين في ايه بكرة

طب مااستنى واشوف ... الموضوع مش هيحصل في يوم وليلة

بس فين الحرية ؟؟؟!!!

الحرية مش عايزة فترة عشان تتحقق ... مش لازم استنى سنتين عشان اشوف حرية

النظام القديم مكانش بيقبل النقد ..... الجديد مش بس مابيقبلش .. لا وكمان بيحاكم المدنيين محاكمات عسكرية

الجيش ضرب متظاهرين بياكدوا على مطالب الثورة في 9 مارس وكمان عذب ناس منهم ...بحجة انهم بلطجية ... عشان الناس تصقفلوا

مش مؤمن بحق الشباب بانهم يعتصموا عند كليتهم ..رفضا انهم يكملوا دراسة تحت ايد رمز من رموز النظام القديم

رافضين انهم في الوقت اللى البلد فيه بتنضف ...يسيبوا رمز مضلل من رموز النظام القديم عميد كليتهم و مسئول عن تخرج دفعة جديدة من الاعلاميين الاحرار او المفروض يعنى يبقوا احرار

و غير ان الشرطة عسكرية دخلت حرم الجامعة تفض الاعتصام ... اتفصل تسع طلاب منهم فصل نهائى ....غيرالاساتذة المتحولة للمجلس التاديبي بسبب انهم تعاطفوا معاهم

انا وغيرى اتهددنا بالتحويل لمجلس تاديبى .عشان مارسنا سياسة في الجامعة

فين تنضيف الجامعات من رؤسائها وعمدائها اللى تم تعينهم من امن الدولة .. مش ده برضه مطلب اساسى للثورة عايزة تمحى الماضى الفاسد من تاريخ مصر !!! مش ده مطلب للثورة اللى حلمت بيها واقنعت بمطالبها ونزلت انا وغيرى عشان نحققها !!!

ده حتى مش مؤمن بحق الشباب انهم يحلموا ... ويروحوا عند سفارة الكيان اياه ياكدوا لنفسهم ان حلمهم حيتحقق قريب .. او يأكدوا على الاقل انهم اقوياء ويقدروا ينفذوا كل اللي بيحلموا بيه ... يأكدوا لنفسم ان مصر ممكن ترجه دولة عظمى قويةوبتهمة انهم بلطجية ضرب عليهم نار و قنابل مسيلة ... لا واعتقالات كمان ..

حاولت ادور على الحلو في الموضوع ..قلت يمكن عشان الموضوع فيه خطا سياسى و مش وقته (افتراض طبعا).... وده حساب لأى حد بيخطأ خطأ سياسى .. وتنفيذا لمطلبنا في العدل والحكم بالقانون بس لو الخطا السياسى عقابه كده ...

فين عقاب اللى اجرموا سياسيا قبل كده في مصر ..

الجيش وقف قصاد شعبه حماية للسفارة الاسرائيلية ... ومعرفش يحمى كنيسة واتنين ...او يمكن مكانش عايز ومش هامه

قلت في البداية انى كنت فاكر المجلس العسكرى هو اللى هايهتم بالماضى ... وينضف كل بواقى النظام القديم

بس الاعلام لسه زى ماهو ... المحافظين والمجالس المحلية لسه زى ماهم ...

لا الاعلام بقى حر ... ولا رموز النظام القديم في المجالس المحلية اتغيروا !!!

و بعدين فين العدل ؟؟؟ ولاهو احنا برده محتاجين نستنى 5 سنين عشان نشوف عدل !!!!

فين المحاكمات الى هتثبت لنا ان احنا بدأنا عصر جديد في مصر مفهوش حد اعلى من القانون

فين تقديم مبارك للمحاكمة بتهمة الخيانة العظمى، بعد اعتراف المشير بإعطاء مبارك الأمر للقوات المسلحة بقتل المتظاهرين.

فين محاكمة العادلى و اعمدة الداخلية من اللواءات لغاية امناء الشرطة اللى اتسلت برصاصها وجربت اسلحتها واختبرت قدرتها على النشان على عيون المتظاهرين منهم اللى مات ومنهم اللى ربنا رحمه واتعمى بس

ياراجل ده انا كنت مستنى محاكمات كنت مستنى خطوة اولى في التحول لمصر العادلة ...بس الظاهر ان مش ده اللى بيحصل ..وبقى الى هامم في المحاكمات الفلوس و بس .. الفلوس اولا واخيرا !!!!!!

الظاهر ان مش دى الثورة اللى انا كنت عامل حسابى عليها ... والمجلس هنا بيعمل غير اللى طلبناه منه

بس الناس بتقولى المجلس هوا اللى حمى الثورة ... المجلس هو اللى بيحافظ عليها ..المجلس هو الخط الاحمر ... المجلس اكد كذا مره انه مع الثوار ومطالبهم وماينفعش نعترض عليه !!!!

طب اذا كان اللى بيعملو المجلس ده فعلا هو الثورة ... فانا بكره الثورة ... وبكره اللى خدعنى وخلانى اشارك فيها

بكره اللى نقلنا من سجون الامن المركزى ...للسجون العسكرية

بكره اللى خرجنا من تحقيقات امن الدولة ... ودخلنا في محاكمات عسكرية

بكره القانون اللى بيتطبق بحزم على اى شاب بيحلم او عامل معتصم لمطلب ....و بيتنسى ويتزوق بالشهامة والكرم والاخلاق عشان يتحول لعفو لناس تانية

بكره اللى لسه مخلى الكبير بيتعالج في مستشفى شرم ... والصغير مرمى في عنبر في القصر العينى .ده اذا حد عبره ووداه هناك

بكره العدالة الاجتماعية لو هى دى .... بكرهها لو هتساوى بين القاتل والمقتول

بكره الثورة اللى خليتنا نوصل لظروف اقتصادية اصعب من ايام النكسة ... على حد تعبير المشير

بكره الثورة اللى مات واتصاب بسببها ناس كتير ... عشان يوصلوا رسالة تغير لباقى الناس الحية في مصر

وكل اللى طلعوا بيه ... استكر 25 يناير على العربية .. او اغنية يا بلادى على الموبايل

ماتو والناس برده ماتغيرتش ومش عايزه تتغير

بس انا سمعت كده ان في ناس راجعة تانى التحرير يوم 27.. معترضة نفس اعتراضى ... كانوا معايا في ال18 يوم. ومستعده تقف زى الاول واكتر عشان ثورتنا تكمل .ومش خايفة من حاجة ولا من حد ..

الحاجة الوحيدة اللى خايفين منها بعد ربنا ... خوفهم ان دم الشهيد يروح هدر .... وان المصابين مايشوفوش تغيير في مصر يعوضهم الخسائر اللى خسروها .... خوفهم ان حلمهم وحلم اللى ماتوا ميتحققش

والغريب ان في ناس معترضة وشايفاها التفاف على رأى اغلبية

طب هو راى الاغبية ايه في المحاكمات !!!

راى الاغلبية ايه في عمداء ورؤساء الجامعات!!!

راى الاغلبية ايه في المحافظين والمجالس المحلية!!!

راى الاغلبية ايه في المعتقلين من ايام الثورة لغاية دلوقت من الشباب !!!!

واللى بيتحاكموا محاكمة عسكرية!!!

رايهم ايه في جلسات الحوار الوطنى اللى فيها ناس من الوطنى !!!!

وبرده القرارات بتطلع من غير استشاره!!!

واذا كان كل اللى هامم الاغلبية الحفاظ على رأيهم في الاستفتاء بـــ"نعم"

فاحب افكرهم ان واحد اعترض على راى الاغلبية هو المجلس العسكرى

لان السيناريو اللى اتنفذ ده بعيد كل البعد عن سيناريو نعم

اذا كان كل اللى هامم الاغلبية نعم بس ... ففى ناس تانية هاممها حجات اكتر من كده بكتير

ناس هاممها ان الثورة اللى خليتك تعرف تقول رأيك في استفتاء... تكمل ويبقى كل استفتاءاتنا وانتخابتنا اللى جايين كده

يوم 27 مايو ... مش ثورة تانية .... ده هي نفس الثورة الاولى .. الثورة الاولى اللى لسه مكملتش

يوم 27 مايو ... هو اخر فرصة ليا تثبتلى ان انا ماتخدعتش ولا حاجة ... وان الثورة اللى انا عايزها هاتتحقق ...

.................اخر فرصة تثبتلى ان انا مش بكره الثورة