Subscribe:

Ads 468x60px

الاثنين، 13 سبتمبر 2010

صوت طل كل يوم حيطل



معلوماتى عنها بسيطه زى بساطة عمرها
فقط 19 عام لا غير أو قول 18 ماهى قضت عام منهم فى الحبس
أه حبس
على فكره إحنا بنتكلم عن بنت
أه بنت
طل الملوحى
بنت سوريه أعتقلتها قوات القط بشار المشأسد
بشار بيستسئد على بنت عندها 19 سنه ومن يوم ما شفناه ماشفناش طلقه طلعت من بندقيته على جندى إسرائيلى من إللى بيبرطعوا فى الجولان المحتله
ياعم الأسد شوفلك حد قدك أتشطر عليه مش بتتشطر على بنت عندها 19 سنه
هى عملت إيه
أحتلت أرضم ما إللى أحتل الأرض وأغتصبها وأغتصب عرضك وبلدك معاها إنت عارفه وشايفه وعايز تفاوضه وبتدور على وسيط شريف
تفتكر لما تعتقل طل صوتها حيبطل يطل
لا يا بشار مش حيبطل
صوت طل كل يوم حيطل

الحريه لطل
والسجن لخونة بلادهم
لخونة بنادقهم
أه قبل ما أنسى عايزيين نعمل مظاهره قدام السفاره السوريه نعلن فيها رفضنا التام وإحتجاجنا على إعتقال طل
يسقط يسقط بشار الأسد

الثلاثاء، 9 فبراير 2010

وحياة أمى ما حروح أستقبل البرادعى



وحياة أمى ماحروح أستقبل البرادعى

يراعى إنى بردعاوى صميم
بس والله عمايل العيال بتاعت الفيسبوك قربت تجيبلى شلل سياسى وألعن أبو أم البرادعى وإبقى "نورى" من بكره ..

عندى بالظبط أكتر من 200 رساله على الأنبوكس فى الفيسبوك كلهم نفس ذات المضمون فى نفس ذات الوقت
كل يوم بتجينى الرساله دى من أكتر من خمستعشر جروب ورا بعض

دى واحده من الرسايل إللى بتيجى عمال على بطال


عايزين التغيير ؟ قفوا بجانب الرجل الوحيد الذى تجرأ على تحدى النظام فى مصر وقال انا مستعد للترشح ولكن ليس قبل ان يتم تعديل الدستور لى ولغيرى حتى نترشح مستقلين.
اذهبوا لأستقبال البرادعى فى يوم 19 /2 حتى لو كنتم من انصار حمدين صباحى او عمرو موسى او ايمن نور
ايا كان حتى يعرف النظام انننا ضده ونريد التغيير



طب شوفوا الأول الأخطاء الموجوده كتير جدا فى الدعوة

البرادعى مش هوه أول راجل أعلن التحدى ده إطلافا وإلا يبقى نسينا أيمن نور ..
مسألة ترشيح البرادعى مش مىكدة لحد دلوقتى وهوه مره أه ومره لا وكل يوم برأى
برغم إنى بردعاوى صميم إلا إنى أعتبر حكاية تغيير الدستور دى هروب من الواقع أو محاولة لوضع حجه لنفسه فى حاله تراجعه عن خوض الأنتخابات دى
الشئ الأخطر إن الدعوة حتى الأن لم توجه لمستقبلها الحقيقى رجل الشارع المصرى وليس رجل الفيسبوك ده لو صح تسميته رجلا أصلا إحم إحم إحم ...
هوه إحنا مش حتخرج بقى من كدبة إبريل وإن المصريين موجودين على الفيسبوك أو إن لما واحد يمل أتيند على إيفنت يبقى خلاص جاى والوقفة ولا الحفلة ولا الأستقبال حيكون جبار ومليان رجالة

ياريت ياريت ياريت تراجعوا الأمور دى وتوحدوا الجهود بجد مش بس كلام وتطلعوا إبن الكلب الأنانى إللى عايش فى نسف كل واحد منكم

علشان ربنا يكرمكم ويكرمنا ويكرم البلد دى

أخيراااااااا


مش حقدر أروح أستقبل البرادعى لظروف إمتحاناتيه عندى إمتحان فى الماجستير قبل ميعاد وصوله بكام ساعه كده



إعلان غير مدفوع الأجر




بسرعه كده يا مواطن منك ليه

إلحق العرض الجامد جداااااااااااااااا
من لينك دوت نت
دلوقتى أشترك وإدفع 3 شهور مقدم وخد شهر مجانى
أو إدفع سنه وخد 3 شهور مجانى
إلحق كلم 16333 قول عايز أسماء محفوظ

ومتنساش تقول لكل أصحابك

الخميس، 4 فبراير 2010

إللى يعوزه البوتجاز يحرم على إسرائيل




فوت علينا بكره يا سيد دى كانت زمان
دلوقتى الدوله كلها ماشيه ((ده لو كان فيها حيل تمشى أصلا)) بقاعدة فوت علينا بكره يا مواطن .. مافيش مواطن أصلا ولا حتى وطن
لما دولة ماتلاقيش فيها أنبوبة بوتجاز وتلاقيها بتصدره لدولة يقال إنها من الجيران وبرخص التراب ولك أن تتخيل ماذا لو كانت هذه الدوله هى العدو الأول والأخير لك فى المنطقه وكمان بقى الدوله دى تحتل بلد شقيق بإكمله وأجزاء من بلدان اخرى ...
ده إنت يا أخى لو فيه واحد عامل معاك ولا مع أخوك خناقة فى الشارع مش حترضى تعديه من قدام الطرقه إللى قدام بيتكم تروح تديله السلاح إللى يضربه بيه
طيب سيبك من الأخوه والكلام ده .. ماعدش بيجيب همه
إزاى بيتك محتاج أنبوبة البوتجاز وتديها لعدوك ده فيه مثل حتى بيقول إللى يحتاجه البيت يحرم على الجامع وإحنا محتاجين الغاز فما بالك بإسرائيل مش الجامع
مش بوجه كلام لمبارك ولا نظامه لأنهم مابيسمعوش :)
بس ياريت الناس تتحرك تحس بنفسها وبوضعها أدى النظام إللى بيحكمهم بيوصل الغاز لأسرائيل وبيبهدلنا وبيدينا الأنبوبه بــ 30 جنيه ليه ده حرام ياربى والله
أتحركوا يا عالم
يمكن قريب نشوف ثورة الغـــــــــــــــــــــاز ... ونفجر الأنابيب :)

الأربعاء، 3 فبراير 2010

تشديد الحجز على مسعد أبوفجر بعد إشتباكات الترحيلات بشمال سيناء


فى إتصال هاتفى مع زوجة مسعد : تشديد الحجز على مسعد أبوفجر الموجود بسيناء حاليا بعد حادثه الترحيلات بشمال سيناء
يذكر أنه حاولت مجموعه مسلحه تحرير بعض السجناء من سيناء أثناء نقلهم وترحيلهم فحدثت إشتباكات أمنيه راح ضحيتها ظابط شرطه وجندى وإصابة ثلاثه أخرون , يذكر أن مسعد أبوفجر موجود بسيناء منذ عدة أيام إنتظارا لتنفيذ الحكم القضائى التاسع عشر بالأفراج عنه ولكن مازال الوضع كما هو فهل يفعلها أمن الدوله للمره العشرين ويعتقله من جديد بقانون الطوارئ .. لك الله يا مسعد

الثلاثاء، 2 فبراير 2010

إمتى تطلع يا فجر مصر .. الحريه لمسعد أبوفجر




الحريه لمسعد أبو فجر
الحريه لفجر مصر
...
تخيل أنك يحصل على 18 إفراج قضائى والداخليه تطعن عليهم وترفضهم وتعتقله من جديد
طب ليه !!! طب هوه عمل إيه ؟؟؟
علشان حب مصر
علشان دافع عن حقوق أهاليه فى سيناء
حسبنا الله ونعم الوكيل
كفاية بجد كفاية
يا أمن مبارك يا أمن الدولة ويا دولة الأمن
كفايــــــــــــــــــــــــــــــــــــــــــــــــــــــه
...
من هنا بنطالب بسرعة الأفراج النهائى عن الروائى والمدون السيناوى مسعد أبوفجر ورفاقه يحيى أبو نصيره وشقيق مسعد أحمد أبو فجر
...
هذه الأيام بإنتظار ترحيل مسعد أبوفجر إلى العريش لتنفيذ الحكم القضائى الثامن عشر
فهل يفرج عنه الأمن أم يمارس دنائته ودنائته للمره التاسعه عشر

===============
العالم يتربص بى(إهداء الى مسعد أبو فجر)من الشاعر السيناوى سالم أبو شبانه

العالم لايقف امام عتبه البدوى
يبتعد حتى الكافوره على المفرق
ويتوارى,كلص يتحين الفرصه,ليسطو على الحلم البسيط فى عجله
ياأيها العالم كن بعيدا ,
ليقف النهار الكسول على قدميه
واقترب اكثر,
لاقراء نفسى الاماره بالفوضى,
والشعر.
أنا البدوى,
الذى لايؤمن بخرافه الصحراء فى الصحف اليوميه,
ولا العسكر
ويخاف المرض المباغت
والهرمونات المهربه,
وقصص الغرباء ناكرى الجميل.
خدع نفسه عمرا طويلا,
بصحراء فى الحلم تهب
كجمل هائج
وبدو بالكلاشنكوف,
يصطادون الوعول والصقور فى الشواهق بالاماثيل حول نار الركوه
هل هو امير اندلسى يسقط واقفا
قباله جموع المهووسين
بالنصر؟
ام صرخه لاتفارق الحلق؟
مديه لم تنضها يد هو,
وغضب يورث السوداء,
حقد ياكل الاسوار التى تعلو ببطء.
البدوى المارق فى الغى,
يحسبه المستبد لحما طريا,
ويظنه العابرون على مجلسه على المثلث
أميرا يمانيا يلتهم شطيره خبز,
ويجرع الشاى البارد,والقهوه الماسخه
يهذى عن زيتونه فى أفق الخرافه
تنام فى الصحف اليوميه,وحسابات السماسره
عو لاينام الان على سرير الرمل,
ولايلطم قدميه حصى الخلاء,
لا ولايبتعد كثيرا
كما ظن القريبون منه كعرق الخصى
هو الان الصحراء على ذراعه تنام.

الجمعة، 15 يناير 2010

الشمس مكسوفه وأمن الدوله لا

عاجل ‏


ترحيل النشطاء والمدونين المحتجزين من قسم نجع حمادى إلى مديريه أمن قنا
ولازم نكثف التحركات بسرعه عشان يخرجوا
ده رقم المحافظ ومكتبه ياريت نتصل نحتج ع الأحتجاز بسرعه
مجدى أيوب

0101555700
مكتب المحافظه
0965337333


الشمس مكسوفه وأمن الدوله لا



صباح الجمعه 15 يناير 2010 كسوف حلقى للشمس وإنعدام الكسوف والدم أصلا عند الأمن المصرى


أمن الدوله يحاصر وسط البلد بألالاف من جنود الأمن المركزى ويحظر التجول بمنطقة نقابة الصحفيين ويمنع المترو من التوقف بمحطة جمال عبدالناصر ويهدد ويضرب النشطاء المشاركين بالقافله المتجهه لغزه

وبنفس الأسلوب ولكن فى أقصى الصعيد
الأمن يعتقل النشطاء المتجهين إلى نجع حمادى لزيارة أهالى ضحايا المسيحيين وتقديم واجب العزاء والتضامن معهم
وقد تم ضرب الناشط أحمد بدوى
ومن ضمن المحتجزين
وائل عباس
إسراء عبدالفتاح
باسم فتحى
باسم سمير
ماريان ناجى
شريف عبدالعظيم
أحمد بدوى (تعرض للضرب)
مصطفى النجار
أميره الطحاوى
ناصر عبدالحميد
سلمى عقل
شهيناز عبدالسلام
محمد خالد
حنان
إسماعيل الأسكندرانى
أحمد أبوذكرى
بولا عبده
رؤى إبراهيم
وهم الأن محتجزين بعربة ترحيلات


وسنوافيكم بكل جديد


عاجل ‏:‏ ‏مجموعة المدونين والنشطاء محتجزين فى قسم أول نجع حمادى


عاجل ‏



إحنا مانكلمش محامين يا رجاله إحنا بنبعت كبار البلد والأعيان يخلصوا الموضوع
بعد محاولات مضنية من طرفنا نحن "خط الصعيد" والزميل الناشط أحمد إبن النيل قمنا بحشد وفد كبير من أعيان نجع حمادى (مسلمين ومسيحيين) وكبار البلد بالتوجه لقسم الشرطه لإخراج الشباب والنشطاء وبعدها سيتوجهون للمحافظ للإحتجاج والشكوى

الخميس، 14 يناير 2010

ضرب نار بعد عام من الكتمان

كيف الحال يا جماعه بقالى كتير مابوستش ((من بوست بيست فهو يضع بوستا جديد فى مدونته)) لربما حد يفهمنى غلط يعنى
بعد إنقطاع عام إلا ثلاثه أيام أعود للكتابه فى مدونة ضرب نار
المدونة دى تقريبا كل إللى كتبت عنهم فيها إنقطعت علاقتى بيهم :)) ما عدا الواد ميت
وبرضو هذه المدونة لها ذكريات جميله جدا مع برغم إنى لم أكتب بها أو أنشرها كثيرا
ولكن يبدو أن هذا وقتها
فوسط الضرب الذى نتلقاه من كل مكان لابد وأن يسمع الجميع صوتنا وضرب نارنا
وليبقى بيت الشاعر عبدالرحمن يوسف عنوانها كما كان من عام مضى
الــضــَّــرْبُ بــالــكـَـــفِّ سـَهـــْــلٌ إنْ صَـبــَــرْتَ لــَـهُ و الــضـَّـرْبُ بـالحـــَـرْفِ دَوْمــَــا ً يـــُورثُ الــهـَـلـَعـَا !
===================
منذ عام مضى كانت أخر تدوينة هنا عن المظاهرات الإحتجاجيه على حرب غزه وضد موقف النظام المصرى المشين وقتها
وتناولت التدوينه الأخيره خبر إحتجاز حسام يحيى هو ومجموعه معه أثناء توجههم للمشاركه فى مظاهره أمام مسجد الفتح
===================
ندخل بقى فى مضمون البوست بقى
أزيكم صحيح نسيت اصبح وأمسى عليكم كل حسب توقيته :)
===================
أخوان بلا مرشد
صحيت الصبح لقيت أربع حالات على الفيسبوك ((إستيتسات يعنى)) مضمونها إن الأخوان بلا مرشد يعنى من غير كبير
الناس تقريبا كانوا مستنين إن إعلان المرشد حيكون الخميس زى ما الأخوان فعلا قالوا إنه حيتم إعلان الدكتور بديع مرشدا يوم الخميس ((ليه مش عارف ما البلد كلها عرفت إن بديع بقى مرشد ينصبوه ويسكتوا بقى)) المهم قالك لا المرشد حيعلن خليفته فى الملعب الأخوانى يوم السبت لأن إجتماع المكتب العالمى أخر ((من التأخير يعنى)) الأسم ليوم السبت
ناس بقى قالت أن التأخير ده بسبب الأعتراض على أسم بديع ((مش أسمه إللى هو بديع لا أسمه وشخصه )) وناس تانى قالت إن التأخير نتيجه لأعتراض المكتب العالمى ((أو زى ما الأخوان بيسموه بقى)) على إقصاء حبيب أبو الفتوح .. الله بقى يا أخوان فيه إيه
أنتم قلتم أنه لم يتم إقصاء أحد وأن ده شئ ديمقراطيطى وأن الأنتخابات جابت الأصلح والليله إللى إندوشنا بيها دى تيجوا دلوقتى المكتب العالمى يقول إقصاء ومش عارف إيه
كده يبقى فيه إنه يا أما فعلا فيه أقصاء متعمد لحبيب وأبو الفتوح ودى مشكله
والكارثه بقى إن خروجهم يكون شئ ديمقراطيطى فعلا بس الأخوان رافضين الديمقراطيه ومش عايزينها تأخد "مجاريها" الطبيعيه وده شئ مايطمنش بصراحه :) إرحمونا الله يرحمكم
===================
ده نص ((وول)) جانى على الفيسبوك من الأستاذه شيماء صلاح بيقول
رئيس تحرير الجمهورية في اذاعة الشرق الاوسط في اثناء مناقشة قانون نقل الاعضاء قال بالحرف الواحد """" الراجل علي علي جهاز الانعاش مش عايش بارادة الله عايش بارادة البشر """" طيب سؤال لو ارادة الله اراد موت الراجل دة حتعمله ايه ارادة البشر ؟؟؟ ولو بعد فصله عن الجهاز ربنا اراد انه حيعيش حيقدروا البشر يمنعوه؟؟؟؟؟؟؟؟
بصراحه مش عايز أعلق على كلام المعتوه بتاع الجمهوريه ده علشان كل ما أجيب سيرته تانى يوم يطلع يشتمنى فى المختصر المشمفيد بتاعه
===================
الشمس بكره مكسوفه والدولة عايزنا نتعمى ومانشوفش إللى بيعمله النظام فينا
بكره الصبح فيه كسوف حلقى للشمس يعنى القمر حيجى بين الأرض والشمس فيمنع وصول أشعة الشمس من الوصول للأرض وبيقولا إن القمر حيحجب حوالى 25% من أشعة الشمس ((يا حرام على القمر حيولع بكره وحيشيل الأشعه دى وحده)) المهم بيقولك إن الكسوف بتاع بكره ده مش حيحصل زيه تانى لحد عام 3043 إللى يعيش بقى
إللى يهمنا إحنا أن التعرض لأشعة الشمس فى الوقت ده مضر جدا بالعين وقد يؤدى إلى فقدان البصر لا قدر الله ذلك على أحد
وإن الفلكيين حذروا من النظر لأشعة الشمس مباشرة بالعين المجردة أو حتى بالتيلسكوبات أو المناظير
حكومتنا الغراء طبعا ولا حذرت ولا عملت حاجه تنبه الشعب بيها عن الأضرار دى
شكلهم عايزينا نتعمى أكتر وأكتر علشان مانشوفش إللى بيعملوه فينا
مع إنها كانت فرصه يلهوا بيها الناس عن حاجات كتيره شاغلاهم الأيام دى
يلا يارب واحد أعرفه وإينه ومراته وأبنه علاء برضو يصحوا الصبح تكون الشمس واحشاهم ويبصوا لها بتاع نص ساعه كده ونستريح
ياريت كل واحد يحذر إللى يعرفهم من النظر للشمس وخصوصا الأطفال
===================
كان طيار وبقى صرصار تحت جزمة كل ما هو أمريكى وصهيونى
===================
ياريت الأخوه المصريين يرعوا أخوانهم العرب وخصوصا المغاربه والسعوديين والأردنيين وهما بيعارضوا التوريث يبطلوا يقولوا إحنا مش غنم علشان نتورث :)
===================
أخر حاجه بقى مع كلام عمر طاهر جميل جدا شوفوه
وأنا بهديه ليها :)
أنا ححط الفيديو فى القائمة الجانبيه علشان حبيته جدا :)